ХАМТДАА ИЙМ ЕРТӨНЦИЙГ
БҮТЭЭЦГЭЭЕ ХҮҮХЭД БҮР
АЮУЛГҮЙ БАЙЖ, ӨСЧ ХӨГЖИХ
БОЛОМЖТОЙ.

"Лантуун дохио" нь хүний наймаа, хүүхэд эмэгтэйчүүдийн эсрэг үйлдэгдэж буй хүчирхийллийг таслан зогсоохын төлөө 2013 оноос эхлэн тууштай үйл ажиллагаа явуулж буй шашин, улс төрийн намаас ангид нийгэмд үйлчилдэг төрийн бус байгууллага билээ.

Эрүүл, аюулгүй нийгмийн төлөө бодлогод нөлөөлөх, хүний эрх болон хүчирхийллийн талаарх иргэд, олон нийтийн ойлголт мэдлэгийг нэмэгдүүлэх, нийгмийн хэвшмэл хандлагыг өөрчлөх, болзошгүй эрсдэлээс урьдчилан сэргийлэх мэдлэг ойлголтыг таниулан сурталчлах зорилго дор нэгдсэн салбар бүрийн залуусын нэгдэл юм.

Бид үндсэн 4 чиглэлээр үйл ажиллагаа явуулдаг.

1.Урьдчилан сэргийлэх: Бага насны хүүхдүүдэд хүний наймаа, хүчирхийллээс урьдчилан сэргийлэх ойлголт мэдлэгийг насны онцлогт тохирсон арга, хэлбэрээр ойлгуулах, тэдний эрхийг таниулах, аливаа эрсдэл, аюулаас урьдчилан сэргийлэх зорилгоор ухуулан сурталчлах.

2.Хөгжил хамгаалал: Хөгжлийн хөтөлбөрт суурилсан урьдчилан сэргийлэх үйл ажиллагааг боловсрол хөгжлийн олон талт сургалтаар дамжуулан хүүхдүүдэд тэгш хүртээмжтэйгээр хүргэх

3.Нөлөөлөл: Хүүхдийн эрхэд суурилсан цогц бодлого, эрх зүйн орчныг бүрдүүлсэн хүүхдэд ээлтэй нийгмийг бүтээхэд олон нийтийг уриалах, нөлөөлөх, холбогдох байгууллага руу чиглэсэн бодлогын нөлөөлөл хийх.

4.Оролцоо: Иргэд, олон нийтийн оролцоог нэмэгдүүлэх, сайн дурынхны хөгжлийг дэмжиж, олон талт хөтөлбөрийг хэрэгжүүлэх замаар хөгжил, хамгааллын жишиг тогтолцоог бүрдүүлж, олон нийтийн хүчийг нийгмийн асуудалд чиглүүлэн оролцоог бодит болгоход анхаарах.

Хүний наймаа, хүчирхийллээс хамгаалах мэдлэг ойлголтыг бага наснаас олгох хэрэгтэй мөн хөгжлийн хөтөлбөрт суурилсан арга зүйд тулгуурлан аливаа аюул, эрсдэлээс хүүхдийг урьдчилан сэргийлэх бүрэн боломжтой болохыг өнгөрсөн 10 жилийн туршлагаасаа ойлгож, хөгжлийн хөтөлбөрийн модуль, аргачлалыг нэн тэргүүнд тавьж ажилласан.

Ид шидийн орон төсөл: Хүүхдийн эрхийг хамгаалах, хөгжих боломжийг тэгш, хүртээмжтэйгээр олгох зорилгоор 2017 болон 2020 онд “Ид Шидийн Орон-I & II” хүүхэд хамгаалал, хөгжлийн төвүүдийг Улаанбаатар хотын хамгийн олон хүн амтай, гэмт хэргийн гаралт өндөр, амьжиргааны баталгаажих түвшин доогуур өрхүүд ихэнх хувийг эзэлдэг Сонгинохайрхан болон Баянзүрх дүүргүүдийн алслагдсан гэр хороолол дунд 100 хувь олон нийтийн тусламж дэмжлэгтэйгээр бүтээн байгуулсан. Ид шидийн орон төсөл бол хэн бүхэнд үүд хаалга нь нээлттэй хүүхэд хөгжлийн цогц төв юм. Дахивар хаягдлаар төлбөрөө авдаг системтэй 15-20 төрлийн сургалт дугуйлан, 10 мянга гаруй номын фондтой номын сан, эрүүл аюулгүй тоглоомын талбай, 7 хоногийн 7 өдөр үйлчлэх кофе шоп, хүүхдийн мэргэжлийн сэтгэл зүйчтэй, бүх насныхан зориулсан шидэт ногоон төгөл зэргээс бүрдсэн гэр хороолол дундах олон нийтэд нээлттэй төв билээ. Энэхүү төсөл нь цар хүрээгээ тэлж 2022 онд Дундговь аймагт анхны Ид шидийн орон төвийн жишиг загварыг орон нутагт байгуулсан ба төслийн хэрэгцээ шаардлага, ач холбогдол, үр дүн маш өндөр байсан тул ахин 3 аймагт (Хөвсгөл, Хэнтий, Говь-алтай) жишиг төвийг байгуулж тэгш хүртээмж, тэгш боломжийг илүү өргөн цар хүрээтэйгээр түгээж эхлэв. Орон нутаг дахь Ид шидийн орон төвийн хувьд хүүхдийн эрхийг хамгаалах, хүүхэд бүрд тэгш боломж, чанартай боловсролыг хүртээмжтэйгээр хүргэх, хөгжилд суурилсан хамгааллын үйлчилгээг үзүүлэх, иргэдийн хүчирхийлэл, хүүхдийн эрхийн талаарх мэдлэг ойлголтыг дээшлүүлж, нийгмийн оролцоог нэмэгдүүлж, сайн жишиг тогтоож байгаагаараа онцлогтой.

Үйл ажиллагааны хувьд бүх Ид шидийн орнууд нэгдсэн нэг системийн дор үйл ажиллагаагаа явуулдаг. Жил бүр дунджаар Улаанбаатар хот дахь 2 салбараараа дамжуулан 10,000+ хүүхдэд, орон нутаг дахь 4 салбараараа дамжуулан 20,000+ буюу нийт 30 гаруй мянган хүүхдэд хүрч ажилладаг.

Манай байгууллага нь:

- Хандивын шилэн данс буюу санхүүжилтийн ил тод байдлыг хэрэгжүүлсэн

- Олон улсад нэр хүнд бүхий аудитын байгууллагууд болох E&Y мөн BDO байгууллагуудаар жил бүр санхүүгийн аудитын шалгалтыг өөрсдийн хүсэлтээр оруулдаг

- Иргэд өөрсдөө “Хүүхдэд Ээлтэй Нийгэм Бүтээхийн” төлөө бодитойгоор хувь нэмрээ оруулах боломжийг нээснээр Монголдоо анх удаа Иргэдийн Оролцоог хамгийн өндөрт хүргэж, олон нийтийн 100% хандиваар үйл ажиллагаагаа тогтвортой явуулж байгаа

- Нийт 9,8 тэрбум төгрөгийн мөнгөн болон мөнгөн бус олон нийтийн 100 хувь хандиваар орон нутагт 4, Улаанбаатар хотод 2 Ид Шидийн Орон хүүхэд хамгаалал, хөгжлийн төвийг бүтээн байгуулсан

- Фейсбүүк цахим сүлжээг ашиглан нийгмийг зөв үйлд уриалан, олон нийтийн хүчийг зөв үйл хэрэгт чиглүүлэн, цахимаар хөрөнгө босгох үйл хэргийг амжилттай зохион байгуулсан хэмээн үзэж Facebook компаниас эрхлэн гаргадаг Community Voice ном Initiative хэсэгтээ онцолсон

- 2020 онд НҮБ-ын Эдийн Засаг, Нийгмийн Хорооноос Лантуун Дохио ТББ-д Зөвлөлдөх эрх бүхий статусыг олгосон. Ингэснээр НҮБ-ээс гарах хүний наймаа, хүүхэд, эмэгтэйчүүдийн эсрэг хүчирхийлэл, хүүхдийн эрхтэй холбоотой зөвлөмж, заавруудад тус ТББ нь өөрсдийн үзэл бодлоо тусгах боломжтой болж, НҮБ-ээс зохион байгуулагдах хурал чуулганд төлөөлөгчөө оролцуулах, аман болон бичгэн мэдэгдэл хүргүүлэх эрхтэй болсон гэсэн үг.

Монгол улсын хувьд сүүлийн 30 жилийн хугацаанд энэхүү статусыг хүлээн авч буй цор ганц ТББ болж байна.