Захиргааны хэргийн шүүх Засгийн газрын тогтоолд хүүхдийн эрх зөрчигдсөн гэж дүгнэлээ

Захиргааны хэргийн шүүхээс Засгийн газрын шийдвэрийг хүүхдийн эрх зөрчсөн гэж дүгнэсэн нь унаач хүүхдүүдийн асуудлыг эрх зүйн түвшинд хөндсөн чухал тохиолдол боллоо. Энэ нь цаашид хохирол нөхөн төлүүлэх, бодлогын өөрчлөлт хийх боломжийг нээж байна.

Монгол Улсын Засгийн газарт холбогдуулан “Засгийн газрын 2021 оны 6 дугаар сарын 23-ны өдрийн 171 дүгээр тогтоолын 2 дахь заалтын ‘хурдан морины уралдаан’ гэх хэсэг болон 3 дахь заалтыг бүхэлд нь хүчингүй болгуулах” шаардлага бүхий нэхэмжлэлийг 2021 оны 6 дугаар сарын 29-ний өдөр гаргасан.

Улмаар Засгийн газар 2021 оны 7 дугаар сарын 2-ны өдрийн 183 дугаар тогтоолоор 171 дүгээр тогтоолыг хүчингүй болгож, нэхэмжлэлийн зорилго тодорхой хэмжээнд хангагдсан. Гэвч наадам зохион байгуулах шийдвэрийн улмаас хурдан морины уралдааны бэлтгэл, уралдааны явцад нийт 31 унаач хүүхэд бэртэж, 3 хүүхэд амь насаа алдсан харамсалтай баримтууд хэрэг хянан шийдвэрлэх ажиллагааны явцад тогтоогдсон.

Иймд хүүхдийн зөрчигдсөн эрх, хууль ёсны ашиг сонирхол бүрэн сэргээгдээгүй, учирсан хохирол нөхөн төлөгдөөгүй хэвээр байгаа тул нэхэмжлэлийн шаардлагыг “Засгийн газрын 2021 оны 6 дугаар сарын 23-ны өдрийн 171 дүгээр тогтоолын 2 дахь заалтын ‘хурдан морины уралдаан’ гэх хэсэг болон 3 дахь заалтыг хууль бус байсан болохыг тогтоолгох” болгон өөрчилсөн.

Захиргааны хэргийн анхан шатны шүүх уг нэхэмжлэлийг шийдвэрлэж, шаардлагыг хэсэгчлэн ханган Засгийн газрын 171 дүгээр тогтоол нь хүүхдийн эрхийг зөрчсөн болохыг тогтоосон байна.

Энэхүү хэрэгт эхнээс нь хууль зүйн дэмжлэг үзүүлсэн өмгөөлөгч нартаа болон хамтран ажилласан “Онч нүүдэл” ХХН-ийн хамт олонд талархал илэрхийлье.