“Баавгай болохсон” уран сайхны кино төслийг хамтран хэрэгжүүлэх гэрээнд гарын үсэг зурлаа

“Баавгай болохсон” кино төсөл нь хүүхдийн эрх, боловсролын тэгш бус байдлыг кино урлагаар дамжуулан хөндөх зорилготой.

Лантуун ДОХИО ТББ нь Швейцарын Хөгжлийн Агентлагийн дэмжлэгтэйгээр “Амигдала Филмс” компанитай хамтран “Баавгай болохсон” бүрэн хэмжээний уран сайхны кино төслийг хэрэгжүүлэх хамтын ажиллагааны гэрээнд гарын үсэг зурлаа.

Тус кино нь алслагдсан хороололд амьдардаг 15 настай хүүгийн хүсэл мөрөөдөл, гэр бүлийн амьдралыг өгүүлэхийн зэрэгцээ агаарын бохирдол, боловсролын тэгш бус байдал зэрэг нийгмийн тулгамдсан асуудлыг хөндөнө. Мөн эрх нь зөрчигдсөн хүүхдүүдийн дуу хоолойг нийгэмд хүргэж, бодит нөлөөлөл үзүүлэх зорилготой юм.

“Амигдала Филмс” нь 2017 оноос эхлэн “Баавгай болохсон” (If Only I Could Hibernate) киноны зохиол хөгжүүлэлт дээр ажиллаж ирсэн бөгөөд уг төсөл нь олон улсын хэд хэдэн нэр хүндтэй хөтөлбөр, наадмаас шагнал хүртэж байв. Тухайлбал, “Talents Tokyo” хөтөлбөрийн дээд шагнал, Motion Picture Association болон Asian Film Academy-ийн хамтарсан питчинг уралдааны Ерөнхийлөгчийн нэрэмжит шагнал хүртсэн. Мөн Torino Film Lab, Hong Kong Asia Film Financing Forum, Locarno олон улсын кино наадмын “Open Doors” хөтөлбөрт шалгарч, олон улсын түвшинд хөгжүүлэгдсэн төсөл юм.

Киноны найруулагчаар “Шат” уран бүтээлээрээ танигдсан П.Золжаргал ажиллах бөгөөд уг хамтын ажиллагаа нь нийгмийн асуудлыг урлагаар дамжуулан хөндөж, боловсролын салбарт дэмжлэг үзүүлэх зорилготой.